مشكلة نهضة بركان

 اليوم غادي نخرجو من الخط التحريري ديالنا المرتبط باللغة العربية و غادي نهضرو بالدارجة لي يفهمها كولش لاحقاش الظرفية لي حنا فيها كاتهم كولش.

من مور البداية الكارثية الغير مفهومة فالبطولة لي طمعنا رواحنا باش ننافسو عليها يا حسراه و التصريحات لي كتتبع الماتشات و لي ماكيتحملهاش الجهاز العصبي ديالنا و طبعا كارثة الماتش لول ديالنا فطريق الدفاع على لقب بطولة قارية لي لحد الساعة حنا هوما الأبطال ديالها ، البارح سالت النقطة لي فيّضت الكاس و كانت على شكل بلاغ رسمي من النادي حول المرحلة لي رانا نهضرو عليها ، و ماغاديش يختلفو جوج بلي هداك ما بلاغ ما والو . هداك كلام ديبلوماسي بزاف على لي صاغو داك الشي يكونو نهضاويّين إلا شفنا بعين الإعتبار الحالة المنحطة لي وصلها التريكو ديال النهضة الغالية علينا كتر من راسنا فبزاف ديال المرات . بلاغ هجين مضمونو هو "يكون الخير" ، الخير حنا كاملين كانبغيوه ولكن ماعمرو الخير كايجي من فراغ ولا من تكرار نفس التجارب الفاشلة بنفس الطرق .

علا هادشي ماخليتولناش حل آخر من غير نجيو حنا لعندكم و نسمعولكم البلاغ ديال الجمهور و الكلمة ديال المجموعة ، أول حاجة ماغاديش ننساوها هي الإدارة ولا علاش نكبرولها الشان و نسمّيوها إدارة ؟ نختاصروها فـ"علاء" و "هشام" و "قاسمي" لي كيصّرو و حالفين باش يبقاو يبانو فعينينا صغار و بدون شخصية دايمن من قوة أفعالهم لي حالها كايݣول "حنا ماكنحملوكومش و مانعرفو نديرو حتا شي حاجة إلا مانغزناش الرئيس" و كان آخر تبهليلة داروها فمقابلتنا الأخيرة فالرباط ضد الجيش الملكي لي فداك الماتش ماكانوش تذاكر مخصصة لينا و تمنعنا من الولوج وحنا ضاربين تقريبا واحد الـ1200 كيلومتر ذهابا و إيابا... و من غير أنهم اكتفاو بولوج المركب كأن شيء لم يحدث و زادو من بعد ما ولّينا لبركان فالإستمرار فسياستهم ديال تبلاع الوذنين و مافكروش يخسرو حتا "بلاغ" تضامني ولا إعتذاري لجمهور النادي ! بحال إلا حنا ماكاينينش. و نجيو اليوم لغرض لي كيما شرنا قبل كايخصنا حنا كاملين و كيهم علاقة جمهور بـ"لعابة" و "مدرب" لي هازين التريكو ديال فرقتهم... و بنوضو هاد الأسماء لي المفترض يرحبو بهاد الخطوات و بكل ما من شأنو يمحي الهوّة و الفراغ لي بين اللعابة و الجمهور خصوصا فوقت الأزمات و يمنعونا من ولوج الأكاديمية و ملعب التداريب ! منعونا بطريقة مضحكة خلاصتها "ممنوع تدخلو لأسباب عارفها غي الرئيس حنا ما عندنا ما نديرو" !! و هاد الرئيس فين راه ؟ الله أعلم . حنا الأورونج بويز منين كانقرّرو نديرو شي حاجة...كانديروها. 

دخلنا أو بالأحرى "تسلّلنا" للحصة التدريبية و حاولنا بكل حرقة على الحالة لي رانا فيها نوصلو و لو جزء من الغضب و السخط لي حطونا فيه اللعابة بتخاذلهم و المدرب لي مازال ماورالنا حتا حاجة لحد الآن لي نحتارموه عليها . و كانت الرسائل على الشكل التالي بإختصار :

بنشيخة : عيب علا واحد عندو تجربة ݣد لي عندك فالبطولة و مدرب حالي لفرقة من عيار النّهضة و فبطولة پروفيسيونال يخسر و يعاود و يخرج يبرر داكشي بلي البطولة مازال ما تبدا حتا لمور المونديال !! واش راك تضحك علينا ولا علا راسك ولا علا علاء و هشام و قاسمي و الرئيس ، عيب نخسرو فعشر دقايق بفارق جوج بيوت فماتش سبعين دقيقة و حنا رابحينو فمسابقة حنا أبطالها لحد الآن ، حنا مازال ماݣلنالك إرحل ، و المجموعة لي بين يديك أغلب المدربين لي عندهم شخصية ماكرهوش يكون عندهم غي نصها ، سي بنشيخة نتمناو ماتجريش علا راسك لاحقاش ݣد ماكنصبرو علا شي حاجة للصالح العام لفرقتنا ماكنصبروش بتاتا عليها و لو للحظة فالوقت لي نشوفوها فيه غادية بينا للحيط . 

اللعابة : الفعايل لي كتوصلنا خبارها علا الأغلبية فيكم (باش مانعمّموش) ديال ولاد القـ*ـاب ماشي ديال واحد فيه شوية ديال النفس علا راسو ، واحد جايبينو من لخلا كان يعرفو فيه غي خوتو و صحابو ولا حتا هو يتصورو معاه الناس و عندو حياة مستقرة و صالير محترم بلا منهضور علا لپريمات يخسر بجوج لزيرو و مانشوفو منو حتا مجهود بحال القـ*ـبة و يكمل الماتش و نشوفوه مشا يحتافل مع الفرقة لي دݣاتو فالفيستيير ديالهم !! واش حتا واحد فيكم مافيه النفس لي كيبينها فتصاورو مع ليتيتر يوقفو عند حدو خصوصا هاد الحادث كيوقع لتاني مرة ! واش كتعرفو الجمهور و تمثلو بلي تموتوا معاه فالخط غي منين كايقربو يتسالاو لكم ليكونطرا و تكونو طامعين تجددو ؟ نتوما ففرقة الأغلبية الساحقة من لي كيمارس كورة فالمغرب بل وحتا فإفريقيا يحلمو تكون عندهم ظروف بحال لي هاد الفرقة موفراهالكم...و بالمقابل واشتا كان رد الجميل منكم ؟ التسارع لتكوين نقابات لأغراض مادية باينة . مايشرفش كورة يلعبها شي واحد عقلو جشع و طماع بحالكم و حنا فبركان لي فيه هاد الطباع لي كتخليه يسبّق الماديات علا القيم و الروح و الأخلاق لي خاص تكون عندو كانسمّيوه "جيعان-مشتاق" .

ماعمرو ما حرمناكم من ديك القهوة لي كايديرها كل واحد منكم مرة مرة فقهاوي المدينة ماشي لاحقاش ماكنعرفولهاش . إلا مافهمتوش هاد الهضرة ديال قيم كرة القدم و اللاعب لي ماعندو روح فالتيران مايسوا والو فيها ، غادي تفهمو بلي الموظف لي كيشد الفلوس و ماكيأديش الوظيفة ديالو المصير ديالو العقوبة و الطرد و ممكن حوايج خرا .

 

بنشيخة و اللعابة ، ماجيناش نسمعو لحتا واحد فيكم ، إلا عندكم شي جواب بداو تكتبو فيه و تݣولوه نهار السبت ان شاء الله ، من غير هادشي ماكاينش شي خيار آخر .

عاشت النّهضة الرياضية البركانية

عاشت أورونج بويز حرّة مستقلة

أحفاد الشيباني